開始之前，講清楚。

1. 釋義與合約組成

1.1 「服務」指客人所選方案（附表 A、B、C 或 D）列明嘅服務。「客人」指訂閱或委託 HKAI 嘅人士或機構。「品牌」指客人在訂閱或委託時登記嘅單一品牌。

1.2 合約由本共同條款、客人所選附表、結帳或報價頁所示收費及 HKAI 網站《私隱政策》組成。附表與共同條款有衝突，以附表為準。

1.3 每份訂閱或委託對應一個品牌。同一客人需要多個品牌，須分別訂閱或另行報價。

2. 服務及客人確認權

2.1 HKAI 會以人工智能工具配合 HKAI 人員，提供附表所列服務。

2.2 客人確認權： 公開發佈、廣告投放、廣告預算、付款，及任何以客人名義作出嘅敏感對外回覆，均須客人事先確認。未經確認，HKAI 唔會作出。

2.3 HKAI 嘅人員會在交付前核對 AI 輸出，但客人仍須在使用或發佈前自行審閱內容、資料、價錢、優惠及法律合規（包括廣告及商品說明方面嘅規定）。

3. 收費、續費、取消及退款

3.1 收費以結帳或報價頁所示為準，以港幣計算，除另有列明外已包含 HKAI 服務費，唔包括廣告費、第三方平台費、素材授權費及稅項（如有）。

3.2 訂閱（附表 A、B、C）按月自動續費。 每個計費期結束前，HKAI 會以電郵提醒即將續費嘅日期及金額。客人可在下一個計費期開始前，透過品牌辦公室「會員」頁升級、降級或取消；取消後服務直至已付計費期屆滿為止。

3.3 退款：已開始嘅計費期嘅費用，一般唔設退款，但：（a）如 HKAI 因自身原因未能提供該期主要服務，客人可要求按未提供部分退款或補回；（b）法律另有規定者除外。

3.4 逾期未付：HKAI 可在通知後暫停服務。付款失敗而未能於7 日內補付，HKAI 可終止訂閱。

3.5 價錢調整：HKAI 如調整訂閱價錢，會至少提前 30 日以電郵通知；客人可在新價錢生效前取消。

4. 客人資料及素材

4.1 客人保證其提供嘅資料、文字、圖片、商標及參考素材，客人有權使用，亦無侵犯第三方權利。

4.2 客人須提供準確嘅資料；因資料不準確、不完整或延遲提供而導致嘅延誤或結果，HKAI 唔負責。

4.3 客人唔應上載不必要嘅個人資料（例如客人嘅顧客名單、身份證明文件）。如需處理，須先與 HKAI 另行書面協議。

5. 知識產權

5.1 客人嘅素材：客人提供嘅素材、品牌標誌及資料，權利仍歸客人。客人授予 HKAI 在提供服務所需範圍內使用、複製、修改及儲存嘅非獨家授權。

5.2 交付成果： 客人付清相應費用後，HKAI 就已確認及已交付嘅定稿成果，在法律許可範圍內，將 HKAI 享有嘅一切權利轉讓或授權予客人，供其在品牌營銷中使用。預覽圖、水印圖、草稿、概念及未被選用嘅方案，唔包括在內，客人唔可將之發佈或商業使用。

5.3 AI 內容聲明：成果部分或全部由人工智能生成。HKAI 唔保證 AI 生成內容受版權保護，亦唔保證與第三方作品完全無相似之處。HKAI 會在交付前作合理核對，並會在接獲侵權通知後，合理地協助修改或替換。

5.4 HKAI 嘅權利：HKAI 嘅網站、系統、工作流程、技能（Skills）、提示及方法、介面設計、角色及圖像，均屬 HKAI 或相關權利人所有。客人及任何人未經 HKAI 事先書面同意，唔可以人手或自動化方式（包括爬蟲、截取工具，或用作訓練、改進人工智能模型）複製、擷取、儲存、改作或散播。

5.5 HKAI 可在不披露客人機密資料嘅前提下，將服務過程中學到嘅一般方法及經驗用於改進服務。未經客人書面同意，HKAI 唔會公開客人嘅作品或名稱作展示。

6. 個人資料、保密及資料保留

6.1 HKAI 只為提供服務、處理付款、客戶支援及法律要求而使用客人資料，詳見《私隱政策》。

6.2 HKAI 會使用第三方 AI 服務及雲端服務處理資料，包括可能將資料傳送至香港以外地區。HKAI 不會主動將客人嘅品牌資料提供予第三方作模型訓練之用。

6.3 保留期：（a）未訂閱嘅免費試用資料，14 日後自動刪除；（b）訂閱或委託終止後，HKAI 保留該客人本身嘅檔案最多 2 年，之後經 HKAI 負責人確認方會銷毀；HKAI 自身嘅公司資產唔屬此範圍；（c）客人可隨時要求查閱或更正個人資料，或要求提早刪除（法律要求保留者除外）。

6.4 雙方須對對方嘅非公開商業資料保密，除非法律、法院或監管機構要求披露，或資料已屬公開。保密義務在合約終止後 2 年內仍然有效。

6.5 直接促銷：HKAI 只會在客人另行明確同意後，以電話或電郵傳送優惠或新資訊，客人可隨時取消。

7. 第三方平台及帳戶

7.1 客人嘅專頁、廣告帳戶、網站及相關數據，控制權歸客人。HKAI 只在獲授權範圍內操作，並建議客人透過平台嘅「商家管理」或「管理員」功能授權，唔應提供登入密碼。

7.2 Meta、Google 等第三方平台嘅規則、審批、暫停帳戶、演算法變動及廣告費用，不受 HKAI 控制；HKAI 唔就此負責。

8. 免責及責任上限

8.1 HKAI 以合理謹慎及技術提供服務。HKAI 唔保證任何特定營銷結果，例如點擊、查詢、銷售額、粉絲數、廣告成效或平台審批。

8.2 HKAI 唔就間接、相應或純經濟損失，或利潤、商譽、數據損失負責。

8.3 在法律許可嘅最大範圍內，HKAI 就任何申索嘅總責任，以客人在引致申索事件發生前 3 個月內已向 HKAI 支付嘅服務費為上限（附表 D 以該項目總費用為上限）。

8.4 本條唔適用於：因 HKAI 疏忽導致嘅死亡或人身傷害、欺詐，及依法不能排除或限制嘅責任。如客人屬《管制免責條款條例》所指之消費者，本條只在合理範圍內適用。

9. 暫停及終止

9.1 客人可隨時按 3.2 取消。

9.2 如客人嚴重違反合約（包括逾期未付、提供非法或侵權內容、濫用服務），HKAI 可在合理通知後暫停或終止服務；情況嚴重者可即時終止。

9.3 終止後：已付費用唔設退還（3.3 所列情況除外）；客人須付清已到期款項；第 5、6、8、11 條繼續有效。

10. 不可抗力

任何一方因其合理控制範圍以外嘅事件（包括第三方平台或雲端服務中斷、網絡故障、天災、政府行為）而延誤或未能履行義務，在該事件持續期間，唔須負責。

11. 一般條款

11.1 整份協議：本合約取代雙方就同一事項嘅所有先前口頭或書面協議。

11.2 修訂：HKAI 可更新條款，並會提前 30 日以電郵或網站公告通知；客人如不同意，可在生效前取消。更新唔影響已開始計費期嘅服務範圍。

11.3 轉讓：客人未經 HKAI 書面同意唔可轉讓合約。HKAI 可將合約轉讓予承接其業務之人。

11.4 第三者權利：除合約另有明文，非合約一方人士無權根據《合約（第三者權利）條例》（第 623 章）強制執行合約條款。

11.5 通知：通知以電郵或品牌辦公室內通知發出，視為在發出後 1 個工作天送達。

11.6 可分割性：任何條款被裁定無效，其餘條款繼續有效。

11.7 電子簽署：客人剔選同意或以電子方式付款，即表示接受本合約，具有同等法律效力。

11.8 管轄法律及爭議：適用香港特別行政區法律；雙方同意由香港法院享有非專屬管轄權。如雙方同意，爭議可先經調解。

11.9 語文：中英文版本如有歧義，以中文版本為準。

附表 A　Plan A：品牌創作（HK$988／月）

A1. 內容：品牌分析、方向提案及圖片創作（自助創作，沿用客人已確認嘅品牌資料）。

A2. 每月額度（按曆月計，唔累計）：（a）品牌分析 50 次；（b）預覽圖 100 張（有水印，存放於相簿）；（c）無水印成品 50 張；（d）重大品牌重新分析 3 次；（e）至少 2 輪方向覆核。

A3. 下載：同一成品再次下載，唔會重複扣減額度。

A4. 水印及預覽：預覽圖只供審閱，唔可發佈或商業使用；取得無水印成品後方可按共同條款 5.2 使用。

A5. 唔包括：帖文撰寫及排程、廣告建議、真人跟進、代為發佈。

A6. 額度用盡：當月額度用盡，服務暫停至下個計費期；客人可升級至 Plan B／C。

A7. 交付時間：服務以系統自助方式提供，HKAI 人員在辦公時間（平日 10:00–20:00，公眾假期除外）核對；唔承諾即時交付。

附表 B　Plan B：品牌內容與排程（HK$2,288／月）

B1. 內容：包含附表 A 全部服務，另加：（a）每月最多 30 個帖文（圖片＋文案）嘅準備及排程；（b）每帖 2 輪編輯修改；（c）Meta 廣告建議（只屬建議）。

B2. 交付時間：客人完成資料及方向確認後，HKAI 於 3 個工作天內交付首 7 日圖文及建議排程。

B3. 確認及發佈：所有帖文須客人逐篇批准。批准內容同批准發佈係兩個獨立確認。HKAI 目前以人手排程，唔會自動出街。

B4. 排程更改：已批准並已排程嘅帖文，客人如更改日期或下架，請預留 24–48 小時作人手處理；因客人太遲更改而已發佈，HKAI 唔負責。

B5. 修改輪次：超過 2 輪嘅修改，或方向全盤更改，視為新工作，另行排期或報價。

B6. 廣告：廣告建議由 HKAI 準備，廣告費由客人直接支付予平台；投放設定須經客人確認；HKAI 唔保證廣告成效。

B7. 額度及月結：每月 30 帖用唔晒唔累計。

附表 C　Plan C：貼心品牌營運（HK$2,988／月）

C1. 內容：包含附表 B 全部服務，另加：（a）平日 WhatsApp 跟進，1 個工作天內回覆；（b）每週 1 份品牌營運回顧（每月 4 次，由 HKAI 整理，經 WhatsApp 交付）；（c）每月 3 組廣告角度測試（廣告費另付）。

C2. 回覆時間：「工作天」指平日（星期一至五，公眾假期除外）；「1 個工作天內回覆」指首次實質回覆，唔等於問題在該時間內解決。

C3. 名額：Plan C 屬限量名額；HKAI 可在名額已滿時暫停新訂閱。

C4. WhatsApp 使用：WhatsApp 對話內容屬客人與 HKAI 之間嘅溝通紀錄，HKAI 會按私隱政策保存；請勿經 WhatsApp 傳送密碼、信用卡資料或客人嘅顧客個人資料。

C5. 廣告測試：測試結果僅供營銷參考。廣告費、投放決定同預算由客人確認。HKAI 唔保證任何測試會提升成效。

C6. 唔包括：真人駐場、24 小時回覆、危機公關、法律或財務意見。

附表 D　AI 解決方案（企業諮詢、設計及自動化）

D1. 服務階段：（a）需求諮詢（了解品牌、流程及使用者）；（b）方案設計（功能、流程、操作體驗）；（c）開發及設定；（d）測試及交付；（e）交付後支援免費支援期 14 日。

D2. 報價單：項目範圍、費用、時間表及付款安排以 HKAI 簽發嘅報價單（Quotation）為準，有效期 30 日。客人接納報價單（以書面、電郵、WhatsApp 確認或付款方式）即成立合約。

D3. 付款：接納報價單時支付 50%，交付時支付餘額 50%，除非報價單另有列明。HKAI 可在收到首期款項後才開始工作。

D4. 客人配合：客人須按時提供資料、帳戶權限、測試及驗收意見。因客人延誤而造成嘅工期延長，HKAI 唔負責，並可重新安排時間表。

D5. 範圍更改：報價單以外嘅功能、整合或修改，須經 HKAI 書面報價及客人確認後方會進行；已進行嘅工作按實際投入收費。

D6. 驗收：HKAI 交付後，客人有7 日驗收。期間未提出書面異議，視為驗收。HKAI 會在合理時間內修正與報價單不符嘅缺陷。

D7. 第三方系統及費用：項目所用嘅第三方服務（雲端、API、AI 模型、通訊平台）嘅使用費、條款及服務水平，由客人與供應商直接約定及承擔，除非報價單另有列明。

D8. 知識產權：客人付清全部費用後，HKAI 專為客人度身開發嘅成果（設定、流程文件、腳本）嘅權利按共同條款 5.2 轉讓／授權予客人；HKAI 嘅既有工具、模板、技能及通用方法（「既有資產」）仍歸 HKAI，HKAI 授予客人在其業務內使用交付成果所需嘅非獨家、永久授權。

D9. 自動化執行責任：自動化系統代客人作出嘅行動（例如發訊息、改資料、付款）須按客人確認嘅規則運作。HKAI 建議對有金錢或對外影響嘅步驟保留人手確認；客人如選擇完全自動，須承擔相應風險。

D10. 保證與責任：HKAI 唔保證系統完全無錯誤或不間斷運作。第 8.3 條嘅責任上限以該項目總費用為準。

D11. 終止：任何一方可在對方嚴重違約並經 14 日書面通知仍未補救時終止。客人終止時，須支付已完成工作及已承諾第三方費用。

D12. 機密及展示：未得客人書面同意，HKAI 唔會公開客人名稱或項目內容作展示。

知識產權及未經授權取用

本網站及 HKAI 提供嘅內容，包括文字、方案設計、技能（Skills）與工作流程、角色與圖像、版面及系統介面，均屬 HKAI 或相關權利人所有，受適用知識產權及相關法律保護。未經 HKAI 事先書面同意，任何人不得以人手或自動化方式（包括爬蟲、機械人、截取工具，以及用作訓練或改進人工智能模型）複製、擷取、儲存、轉載、改作、散播或以其他方式使用上述內容。如有違反，HKAI 保留要求停止使用、索償及採取其他法律行動嘅權利，行為人可能須承擔法律責任。搜尋引擎及 AI 搜尋服務按本站 robots.txt 所列規則索引及引用公開內容，不在此限。如需授權或合作，請透過客服聯絡我哋。

支援

有任何服務、資料或方案問題，可以透過支援接待處留下資料。